मनमाड : येथील शिक्षण क्षेत्रात आपली वेगळी ओळख निर्माण केलेल्या सिद्धी क्लासेस कॅम्पसतर्फे इयत्ता १० वी व १२ वी (२०२५-२६) च्या विद्यार्थ्यांसाठी आयोजित ‘आशीर्वाद व शुभेच्छा सोहळा’ मान्यवरांच्या उपस्थितीत अत्यंत उत्साहपूर्ण व प्रेरणादायी वातावरणात संपन्न झाला. विद्यार्थ्यांच्या उज्ज्वल भवितव्यासाठी मार्गदर्शन, प्रेरणा आणि संस्कार यांचा सुंदर संगम या कार्यक्रमातून पाहायला मिळाला.
कार्यक्रमाची सुरुवात मान्यवरांच्या हस्ते सरस्वती पूजनाने करण्यात आली. देवकी हॉस्पिटलचे संचालक डॉ. रवींद्र राजपूत हे प्रमुख मार्गदर्शक म्हणून उपस्थित होते. त्यांनी विद्यार्थ्यांना यशाची खरी व्याख्या समजावून सांगत ध्येय, जिद्द, शिस्त आणि स्मार्ट वर्क या चार सूत्रांवर भर दिला. सोशल मीडियाचा अति वापर टाळून अभ्यासावर लक्ष केंद्रित केल्यास कोणतेही ध्येय अशक्य नसल्याचा संदेश त्यांनी दिला. सिद्धी क्लासेसमधील विद्यार्थ्यांमधील शिस्त, आत्मविश्वास आणि अभ्यासू वृत्तीचे त्यांनी विशेष कौतुक करत संस्थेच्या कार्याचा गौरव केला.
प्रभाग क्रमांक ५ मधील समाजसेवक वाल्मीक आप्पा आंधळे यांनी क्लासेसमधील प्राध्यापक, शिक्षक आणि संचालकांच्या सातत्यपूर्ण मेहनतीचे कौतुक करत विद्यार्थ्यांना पुढील वाटचालीसाठी प्रेरणादायी शुभेच्छा दिल्या. नगरसेविका कमलताई वाल्मीक आप्पा आंधळे यांनी विद्यार्थ्यांना आशीर्वाद देत परिश्रम आणि चिकाटीच्या जोरावर यश संपादन करण्याचे आवाहन केले.
क्लासेसच्या संचालिका प्रा. भाग्यश्री दराडे यांनी विद्यार्थ्यांना आत्मविश्वासाने पुढे जाण्याचा संदेश देत त्यांना शुभेच्छा दिल्या. बारावीच्या विद्यार्थिनी हिमांगी मूलचंदानी व सई सोमासे यांनी प्रभावी भाषणातून उपस्थितांची मने जिंकली. कोमल आव्हाड व स्नेहल पाटील यांनी शिक्षकांप्रती कृतज्ञता व्यक्त केली, तर वेदा शेवाळे व दीक्षा इंगळे यांच्या शेरोशायरीने वातावरण प्रसन्न झाले. ऋतुजा तुपे व प्रियांका शेळके यांच्या नृत्याने कार्यक्रमाची रंगत अधिकच वाढली.
कार्यक्रमाचे सूत्रसंचालन निधी घोडके व वेदांत जाधव यांनी प्रभावीपणे केले. या सोहळ्याच्या यशस्वी आयोजनासाठी प्रा. अरुण सोनवणे, प्रा. मयूर आहेर, प्रा. राहुल गुंडगळ तसेच श्रद्धा मॅडम, उबाळे मॅडम, गांगुर्डे मॅडम व सरस्वते मॅडम यांचे मोलाचे योगदान लाभले.
शेवटी क्लासेसचे संचालक डॉ. भागवत दराडे यांनी सर्व मान्यवर, शिक्षक, पालक व विद्यार्थ्यांचे आभार मानले. प्रेरणा, संस्कार आणि गुणवत्तापूर्ण शिक्षण यांची परंपरा जपणाऱ्या सिद्धी क्लासेस कॅम्पसचा हा सोहळा विद्यार्थ्यांसाठी नव्या उमेदीचा आणि आत्मविश्वासाचा स्रोत ठरला.
