देशाचे पंतप्रधान नरेंद्र मोदी यांच्या वाढदिवसानिमित्त सेवा संकल्प अभियानांतर्गत व प्रदेशाध्यक्ष रविंद्र चव्हाण यांच्या वाढदिवसाचे औचित्य साधून भाजपा
नांदगांव विधानसभा मतदारसंघातील विविध विषयांवर चर्चा करण्यासाठी आढावा बैठक संपन्न झाली.
मनमाड येथील पल्लवी मंगल कार्यालय, मनमाड येथे पार पडलेल्या या बैठकीच्या अध्यक्षस्थानी जेष्ठ नेत्या जयश्री दौंड या होत्या. नांदगाव तालुका दुष्काळी जाहीर व्हावा, जनावरांसाठी चारा छावण्या, ग्रामीण भागात टँकरद्वारे पाणी पुरवठा, नांदगाव तालुका कायमस्वरूपी दुष्काळमुक्त होण्यासाठी उपाययोजना आदि विषयांवार ठराव पारित करून याचा पाठपुरावा करणेबाबत अध्यक्षांनी सूचना केल्या.
भाजपाचे विधानसभा प्रमुख गणेश धात्रक यांनी सदर बैठकीचे आयोजन केले होते. यावेळी जिल्हा उपाध्यक्ष नितीन पांडे यांनी आपल्या मनोगतात सेवा संकल्प अभियान व नरेंद्र मोदी यांच्या कामाबद्दल माहिती दिली तर बाजार समितीचे माजी सभापती दिपक गोगड यांनी तलाठी कामबंद आंदोलन बाबत सूचना मांडली. तलाठी आंदोलन लवकर न संपल्यास त्यामुळे पीक पंचनामे व इतर कामात येणाऱ्या अडथळे निदर्शनास आणून दिले.
कार्यक्रमाच्या अध्यक्षा जयश्री दौंड यांनी सेवा संकल्प अभियान, आजची पक्षाची भूमिका, पक्ष संघटन, आदि बाबत मार्गदर्शन केले. गणेश धात्रक यांनी अशाच बैठकांचे तालुक्यातील गावोगावी आयोजन करून पक्ष संघटन मजबूत करण्याचा मानस बोलून दाखवला तसेच बैठकीत पारित सर्व ठराव राज्य शासनाकडून मंजूर करण्यासाठी पाठपुरावा करण्याचे आश्वासन दिले. नांदगाव तालुक्याचा नार-पार मध्ये समावेश करून तालुक्यात पाटचाऱ्यांचे जाळे निर्माण करून तालुक्याच्या दुष्काळवर कायमस्वरूपी उपाययोजना निर्माण करण्यासाठी शासन दरबारी प्रयत्न करणार असल्याचेही धात्रक यांनी सांगितले.
स्थानिक तांडयावरील कलाकार यांनी जिद्द मेहनतीने तयार केलेल्या छबिला या चित्रपटाला राष्ट्रीय पुरस्कार मिळाल्या बद्दल निर्माते व कलाकार यांना प्रोत्साहन देण्यासाठी छबिला चित्रपट टीमचा सन्मान करण्यात आला.
बैठकीत नांदगांव विधानसभा मतदारसंघात नव्याने नियुक्त करण्यात आलेल्या पक्ष पदाधिकाऱ्यांचे सत्कार करण्यात आले. बैठकीस मा. प्रदेश पदाधिकारी, जिल्हा पदाधिकारी, सर्व मोर्चा व आघाडी पदाधिकारी, मंडल प्रमुख, मंडल प्रभारी, बुथ प्रमुख, शक्ती केंद्र प्रमुख, बी.एल.ए-२, महिला आघाडी, जिल्हा व मंडल पदाधिकारी प्रमुख,
सर्व ज्येष्ठ नेते व पदाधिकारी, सदस्य भारतीय जनता पार्टी मोठ्या संख्येने उपस्थित होते.
