सार्वजनिक बांधकाम विभागाच्या रस्त्यांवरून प्रवास करताना वाहनधारकांना, विशेषतः महिलांना, स्वच्छतागृहांसारख्या मूलभूत सुविधांच्या अभावामुळे गैरसोयीचा सामना करावा लागतो. ही अडचण दूर करण्यासाठी नाशिक जिल्ह्यातील प्रमुख राज्य महामार्ग आणि राष्ट्रीय महामार्गांवर प्रवाशांना मूलभूत सुविधा उपलब्ध करून देण्यासाठी सार्वजनिक बांधकाम विभागाने चार ठिकाणी जनसुविधा केंद्रे उभारण्याची प्रक्रिया सुरू केली आहे. या केंद्रांमध्ये महिला, पुरुष आणि दिव्यांगांसाठी स्वतंत्र स्वच्छतागृहे, २४ तास पाणी व वीजपुरवठा, पार्किंग, सौरऊर्जा आणि इलेक्ट्रिक वाहनांसाठी (EV) चार्जिंग स्टेशन अशा सुविधा उपलब्ध होणार आहेत.
या प्रकल्पांसाठी डिझाईन, बांधकाम, वित्तपुरवठा, संचालन आणि देखभाल (DBFOT) या स्वरूपात इच्छुकांकडून स्वारस्य देकार मागवले आहेत. केंद्रांचा सवलत कालावधी १५ वर्षांचा राहणार आहे.
– देशमाणे बु. : नाशिक-निफाड-येवला-वैजापूर मार्गावर पहिले केंद्र प्रस्तावित आहे.
– गिरणारे : अडगाव-गिरणारे-वाघेरा-चिंचवड-खेड-हरसूल-खडक-ओझर-घोडबारी राज्य मार्ग २८ वर दुसरे केंद्र उभारण्यात येणार आहे.
– चिखल ओहोळ : मुंबई-नाशिक-धुळे-आग्रा राष्ट्रीय महामार्ग ३ वर तिसरे केंद्र प्रस्तावित आहे.
– सुरगाणा : सौंदाणे (NH-3)-देवळा-कळवण-कनाशी-हटगड-खडकी-सुरगाणा-उंबरठा-वाघाई राज्य मार्ग २२ वर चौथे केंद्र उभारण्यात येणार आहे.
