नांदगाव शहर व परिसरातील महिलांसाठी नांदगाव येथील ग्रामीण रुग्णालयात सिझेरियन प्रसुतीची सुविधा तात्काळ उपलब्ध करून देण्यात यावी या मागणीचे निवेदन क्रांतीसुर्य बिरसा मुंडा आदिवासी मंच महाराष्ट्र राज्य यांच्या वतीने नांदगाव ग्रामीण रुग्णालयाच्या वैद्यकीय अधीक्षक सौ.प्रतिभा पगार यांना देण्यात आले.
आज नांदगाव शहर व परिसरातील ग्रामीण भागातील महिलांना सिझेरियन प्रसूतीची गरज भासल्यास मालेगाव, धुळे किंवा नाशिक येथे जावे लागते. यामुळे विशेषतः आदिवासी व गरजू कुटुंबांना आर्थिक, मानसिक तसेच प्रवासाचा मोठा त्रास सहन करावा लागतो.
नांदगावमध्येच स्त्रीरोग व प्रसूती तज्ज्ञ, भूलतज्ज्ञ, ऑपरेशन थिएटर, आवश्यक औषधे आणि २४ तास आपत्कालीन प्रसूती सेवा उपलब्ध करून द्यावी, ही आग्रही मागणी करण्यात आली.
यावेळी मंचचे संस्थापक कपिल तेलुरे, सुनील वाघ, श्रावण पवार, दगडू मोरे आदी उपस्थित होते.
