गेल्या तीन आठवड्यापासुन आंदोलनास बसलेले एस.टी.कर्मचारी विलीनीकरणाच्या मागणीवर ठाम आहेत, जोपर्यंत मागणी मान्य होत नाही तोपर्यंत माघार नाही, या भुमिकेवर कर्मचारी ठाम आहेत.
एसटी कर्मचाऱ्यांना वेतनवाढ देण्याचा निर्णय महामंडळाने जाहीर केल्यानंतर आमदार गोपीचंद पडळकर आणि सदाभाऊ खोत यांनी संप स्थगित करण्याची घोषणा पत्रकार परिषदेत केली. मात्र, विलीनीकरणाच्या मागणीवर ठाम असलेल्या एसटी कर्मचाऱ्यांनी संप सुरूच ठेवला. यामुळे संपाचा तिढा गुंतागुंतीचा बनला असून, महामंडळ संपकऱ्यांवर कठोर कारवाई करण्याचे संकेत दिले आहेत.
अचानक पत्रकार परिषद घेऊन पडळकर आणि खोत यांनी भूमिका मांडल्यानंतर अॅड. गुणरत्न सदावर्ते दुपारी आझाद मैदानात गेले आणि कर्मचारी विलीनीकरणावर ठाम असल्याचे जाहीर केले. पडळकर व खोत यांना या आंदोलनातून मुक्त करत असल्याचेही अॅड. सदावर्ते म्हणाले. त्यामुळे संप मागे न घेता कर्मचारी आझाद मैदानातच ठाण मांडून होते.
