पानेवाडी येथील जिल्हा परिषदेच्या शाळेतील विद्यार्थ्यांना प्रजासत्ताक दिनाच्या दिवशी मोफत देण्यात येणारे गणवेश मुख्याध्यापक व शालेय समितीच्या हलगर्जीपणामुळे मिळाले नसल्याने पालकांनी मुख्याध्यापकांना धारेवर धरत जाब विचारला मात्र उडवाउडवीची उत्तरे मिळाल्याने पालकांनी संताप व्यक्त केला
पानेवाडी येथील जिल्हा परिषदेच्या शाळेत सर्व शिक्षण अभियान अंतर्गत अनुसूचित जाती, जमातीच्या विद्यार्थीसह सर्वच विद्यार्थिनींना गणवेश घेण्यासाठी शासनाकडून पैसे आले आहे. सदरचे पैसे हे शाळेच्या खात्यात जमा करण्यात आले आहे मात्र शाळेचे मुख्याध्यापक व शालेय समितीने विद्यार्थ्यांना २६ जानेवारी प्रजासत्ताक दिनाच्या दिवशी गणवेश वाटप करणे बंधनकारक असतांना एकही विद्यार्थ्यांला गणवेश देण्यात आला नाही त्यामुळे पालक वर्गात संताप व्यक्त करण्यात आला. सदर शाळेचे ध्वजवंदन झाल्यानंतर सर्व पालकांनी याबाबत शालेय समिती व मुख्याध्यापक यांना जाब विचारला मात्र गोंधलेल्या मुख्याध्यापक आणि शालेय समितीच्या सदस्यांनी शिक्षण विभागाकडून पैसे मिळाले नसल्याचे कारण पुढे केले तर एक दोन दिवसात गणवेश देऊ असे सांगितले शासन विद्यार्थ्यांना मोफत गणवेश देणार आहे तालुक्यातील इतर सर्व शाळांना शासनाकडून गणवेशासाठी पैसे आले असतांना तुमच्याकडेच का आले नाही? याबाबत जाब विचारून शाळा प्रशासनाला धारेवर धरले. त्यामुळे शाळेत यावेळी चांगलाच गोंधळ उडाला होता. परंतु ग्रामपंचायतीचे ज्येष्ठ माजी सरपंच बाळासाहेब आव्हाड यांनी मध्यस्थीती केल्यानंतर वादावर पडदा पडला. दरम्यान सदरचे या शाळेचे मुख्याध्यापक हे मालेगाव येथून अप-डाऊन करतात त्यामुळे शाळेचा कारभार ते सांभाळण्यास नेहमी अपयशी ठरत असल्याने त्यांच्या बदलीची मागणी यावेळी नागरिकांनी केली.
