राष्ट्रपतिपदाच्या निवडणुकीची रणधुमाळी सुरू असताना आता उपराष्ट्रपतींच्या निवडणुकीची औपचारिक घोषणा झाली आहे. निवडणूक आयोगाने उपराष्ट्रपतींच्या निवडीसाठी जाहीर केलेल्या वेळापत्रकानुसार ६ ऑगस्टला मतदान होईल. त्याच दिवशी निकालही येतील.
उपराष्ट्रपतिपदाच्या निवडणुकीसाठी मुख्य निवडणूक आयुक्त राजीव कुमार यांनी आज जाहीर केलेल्या वेळापत्रकानुसार पाच जुलैला औपचारिक अधिसूचना निघेल. १९ जुलैपर्यंत उमेदवारी अर्ज दाखल करता येईल. त्यानंतर २० जुलैला अर्जांची छाननी होणार असून उमेदवारी अर्ज माघारी घेण्याची अंतिम मुदत २२ जुलै असेल. सहा ऑगस्टला निवडणूक होईल. त्याच दिवशी मतमोजणी देखील होणार आहे.
