राज्याचे विरोधी पक्षनेते, राष्ट्रवादी काँग्रेस पार्टीचे नेते अजितदादा पवार यांनी छत्रपती संभाजी महाराजांबद्दल उच्चारलेल्या अपमानजनक विधानाच्या निषेधार्थ सोमवारी दुपारी येथील एकात्मता चौकात भारतीय जनता पक्ष, मनमाड मंडल, बाळासाहेबांची शिवसेना पक्ष व आरपीआयतर्फे अजित पवारांच्या प्रतिमेला चपलांचा हार घालत तीव्र निदर्शने करून निषेध करण्यात आला. ना. अजित पवार यांच्यावर कारवाई करावी अशी मागणी यावेळी करण्यात आली.
येथील एकात्मता चौकात वरील तिनही पक्षाच्या कार्यकर्त्यांनी एकत्र जमून अजित पवार यांच्या विरोधात घोषणाबाजी करत तीव्र निदर्शने केली. त्यांच्या प्रतिकात्मक प्रतिमेला चपलांचा हार घालून अजित पवार यांनी केलेल्या वक्तव्याचा निषेध करण्यात आला. यावेळी भाजप जिल्हा उपाध्यक्ष नितीन पांडे, नितीन परदेशी मनोगत व्यक्त केले. भाजपचे शहराध्यक्ष जयकुमार फुलवाणी, जिल्हा उपाध्यक्ष नितीन पांडे, संदीप नरवडे, महाविर ललवाणी, आरपीआयचे दिनकर धिवर, बाळासाहेबांची शिवसेना पक्षाचे उपजिल्हा प्रमुख सुनील हांडगे, वाल्मीक आंधळे, आमिन पटेल, अकबर शाह, एकनाथ बोडखे, अनंता भामरे, सुमेध मिसर, बुरहान शेख, दिपक पगारे, अॅड. राजेंद्र पालवे, कांतीलाल लुणावत आदींसह पदाधिकारी, कार्यकर्ते यावेळी मोठ्या संख्येने उपस्थित होते.
