सर्वोच्च न्यायालयाच्या निर्देशानुसार नुकतीच स्थानिक स्वराज्य संस्थेतील नगरपरिषद व नगरपंचायत निवडणुकांची रणधुमाळी संपूर्ण महाराष्ट्रात संपन्न झाली.
यातच मनमाड नगरपरिषदेची देखील सार्वत्रिक निवडणूक पार पडली. शिवसेना, भाजपा व रीपाई महायुतीने मनमाड नगर परिषदेवर आपला झेंडा रोवला. निवडणुकीचे नेतृत्व तालुक्याचे आमदार सुहास कांदे यांनी करीत आपले तालुक्यातील वर्चस्व पुन्हा एकदा सिद्ध केले. नवनिर्वाचित नगराध्यक्ष योगेश पाटील व नगरसेवकांचा पदग्रहण सोहळा नुकताच पार पडला.
यातच आता स्वीकृत नगरसेवक निवडीची चर्चा संपूर्ण शहरात कट्ट्या कट्ट्यावर सुरू झाली आहे, मला स्वीकृत सदस्य करण्यासाठी माझी शिफारस करावी अशी राजकीय मंडळींकडून स्वीकृत नगरसेवक पदासाठी फिल्डिंग लावण्यात येत आहे. शहरात महायुतीने आमदार सुहास कांदे यांच्या नेतृत्वात एकाहाती सत्ता मिळवलेली असल्याने त्यांचा निर्णयच अंतिम मानला जात आहे, स्वीकृत नगरसेवकाची माळ कोणाच्या गळ्यात पडेल हे येणारा काळ लवकरच ठरवेल.
मनमाड नगरपालिकेत तीन स्वीकृत नगरसेवक होणार असल्याने या निवडीची चुरस खूप मोठ्या प्रमाणात असल्याचे चित्र आजतरी दिसत असले तरी स्वीकृत नगरसेवकाची माळ कोणाच्या गळ्यात पडेल यासाठी समस्त मनमाडकर जनता उत्सुक आहे.
