नांदगांव :सुमितकुमार जगधने
येथील रेल्वे मालधक्क्यावर मजुरीचे काम करून घरी जात असल्याचे सांगून निघालेल्या एका २६ वर्षीय तरुणाने झाडाला गळफास लावून आत्महत्या केल्याची धक्कादायक घटना उघडकीस आली आहे. पवन कारभारी निंबारे (रा. चंदनपुरी, ता. नांदगाव) असे मृत तरुणाचे नाव आहे. याप्रकरणी नांदगाव पोलीस ठाण्यात अकस्मात मृत्यूची नोंद करण्यात आली आहे.
नेमकी घटना काय?
मिळालेल्या माहितीनुसार, मयत पवन निंबारे हा आपला लहान भाऊ श्रावण निंबारे याच्यासह नांदगाव रेल्वे मालधक्क्यावर मजुरीचे काम करत होता. पवन हा आपल्या आईसोबत चंदनपुरी येथे राहत असून, इतर वेळी आई व भाऊ पवन हे शेती आणि मोलमजुरी करून कुटुंबाचा उदरनिर्वाह करत होते.
२९ मार्च रोजी दुपारी ३ वाजेच्या सुमारास पवनने रेल्वे मालधक्क्यावर मालगाडीतील सिमेंटच्या गोण्या उतरवण्याचे काम पूर्ण केले. त्यानंतर “मी चंदनपुरी येथे घरी जातो,” असे भावाला सांगून तो तेथून निघाला. मात्र, तो रात्री उशिरापर्यंत घरी पोहोचला नाही.
तलावाजवळ आढळला मृतदेह
पवन हा २९ तारखेला सायंकाळी घरी न जाता कासारी जवळील चांदेश्वरी पाझर तलाव परिसरात गेला. तेथील वनविभागाच्या हद्दीतील एका झाडाच्या फांदीला दोर बांधून त्याने गळफास घेतला, ज्यात त्याचा मृत्यू झाला. या घटनेची माहिती पवनची बहीण शकीला वामन डोळे (रा. जतपुरा) यांनी फोनवरून दिली. त्यानंतर श्रावण निंबारे यांनी ३० मार्च रोजी सकाळी नांदगाव पोलीस ठाण्यात माहिती दिली.
पोलीस तपास सुरू
नांदगाव पोलीस ठाण्यात याप्रकरणी भारतीय न्याय संहिता (BNS) कलम १९४ नुसार गुन्हा रजिस्टर नंबर १९/२०२६ अन्वये अकस्मात मृत्यूची नोंद करण्यात आली आहे. सदर घटनेचा पुढील तपास पोलीस निरीक्षक दिगंबर भदाणे यांच्या मार्गदर्शनाखाली पोलीस हवालदार भास्कर बस्ते करत आहेत. तरुणाच्या अशा टोकाच्या पावलामुळे चंदनपुरी परिसरात हळहळ व्यक्त केली जात आहे.
