मनमाड शहरात दिवसेंदिवस वाढत असलेल्या गुन्हेगारी घटनांच्या पार्श्वभूमीवर मनमाड शहरात कायमस्वरुपी कर्तव्यदक्ष. निर्भिड पोलीस निरीक्षकाची नेमणुक करण्यात यावी, या आशयाचे निवेदन रिपाई युवा नांदगाव तालुका अध्यक्ष गुरुकुमार निकाळे यांनी एका निवेदनाद्वारे नाशिक ग्रामीण पोलीस अधीक्षक यांना दिले आहे.
मनमाड शहर हे नाशिक जिल्ह्याचे प्रमुख शहर म्हणून ओळखले जाते. शहराची लोकसंख्या सुमारे दिड लाखाच्या आसपास आहे. संपूर्ण देशभरातून रेल्वेच्या माध्यमातून हजारो नागरीक ये-जा करतात. शहरात गुन्हेगारी कारवायात वाढ झाली असून कायद्याचा गुन्हेगारांना कुठलाही धाक राहिला नसल्याचे वातावरण आहे, त्यामुळे शहरातील चोऱ्यांचे प्रमाण वाढले आहेत, सराईत गुन्हेगाऱ्यांच्या गुन्हेगारीत वाढ झाल्यामुळे सामान्य नागरीक त्रस्त झाले आहेत. शहरातील कायदा व सुव्यवस्थेचा प्रश्न निर्माण झाला आहे, त्यातच आगामी होऊ घातलेल्या नगर परिषद निवडणुकीच्या पार्श्वभुमीवर शहरातील टोळी युध्दात देखील वाढ झाली आहे. कायदा सुव्यवस्थेचा प्रश्न निर्माण करणाऱ्या गावगुंडांवर कडक कारवाई होण्याची गरज आहे, मात्र गुन्हेगारांवर कारवाई का होत नाही? गुन्हेगारांवर वरदहस्त कोणाचा आहे? की ज्यामुळे गुन्हेगार मोकाट फिरुन गुन्हेगारी कारवाया करीत आहेत, हा प्रश्न सामान्य नागरिकांना भेडसावत आहे.
गेल्या काही दिवसापूर्वी शहरात मोटारसायकल चोरांनी धुमाकूळ घातला होता, मोटारसायकल चोरांची टोळी जेरबंद केली असता 14 मोटारसायकल हस्तगत होऊन सुध्दा आरोपींना एका दिवसात जामीन मिळतो कसा? मागील महिन्यात शहरातील प्रतिष्ठीत वकील यांच्यावर सराईत गुन्हेगाराच्या टोळक्याने प्राण घातक हल्ला करुन धारदार शस्त्राने वार केले. तरी सुध्दा सराईत गुन्हेगारांना एका दिवसात जामिन मिळतो? त्यातच काल मनमाड उपविभागीय पोलीस अधिकारी कार्यालयातील पोलीस कर्मचाऱ्यावर सराईत गुन्हेगाराकडून प्राणघातक हल्ला झाला, यामुळे मनमाड शहरातील पोलीस, वकिल यांच्यावर प्राणघातक हल्ले होतात मग सर्व सामान्य नागरीकांना पोलीस कसे संरक्षण देणार? कायदा व सुव्यवस्था पुर्णपणे ढासळली असून पोलीसांचा वचकच शहरावर राहिलेला नसल्याची भावना सामान्य नागरिकांत आहे. तरी या गुन्हेगारी पार्श्वभुमीची चौकशी होऊन कठोर कारवाई व्हावी व मनमाड शहराला कायमस्वरुपी कर्तव्यदक्ष. निर्भिड पोलीस निरीक्षकाची नेमणुक करावी, असे या निवेदनात नमूद केलेले आहे.
