केंद्रीय वाणिज्य व उद्योग मंत्रालयाच्या व्यापार आणि उद्योग संवर्धन विभागाच्यावतीने राज्यांचे स्टार्टअप रँकिंग जाहीर करण्यात आले आहे.यामध्ये स्टार्टअप संस्थांसाठीच्या सहाय्य कामगिरीच्या क्रमवारीत महाराष्ट्र ‘टॉप परफॉर्मर’ ठरला आहे.
राज्यात मुंबई, पुणे, नागपूर आदींसारख्या महानगरांमध्ये असलेले स्टार्टअप्स राज्याच्या इतर भागातही विस्तारले जावेत यासाठी राज्याच्या कौशल्य, रोजगार, उद्योजकता आणि नाविन्यता विभागामार्फत व्यापक धोरण आखण्यात येत आहे, अशी माहिती या विभागाच्या प्रधान सचिव मनीषा वर्मा यांनी दिली.
देशातील एकूण ७२,७०२ मान्यताप्राप्त स्टार्टअप्स पैकी १३,४५० स्टार्टअप्स महाराष्ट्रातील आहेत. देशभरात २०२१-२२ मध्ये सुरु झालेल्या ४४ स्टार्टअप्स यूनिकॉर्नपैकी ११ यूनिकॉर्न्स महाराष्ट्रातील आहेत. यूनिकॉर्न म्हणजे अशी कंपनी जिचे मूल्यांकन ७ हजार ५०० कोटी ते ७५ हजार कोटी रुपये आहे.
