बोर्ड परीक्षेत नियमानुसार कामकाज केल्याचा राग आल्याने पेपर सुटल्यानंतर काही विद्यार्थ्यांनी शिक्षकावर दगडफेक करत जखमी केले. याप्रकरणी मनमाड पोलिस ठाण्यात नोंद करण्यात आली आहे. नीलेश दिनकर जाधव असे या जखमी शिक्षकाचे नाव आहे. नीलेश दिनकर जाधव (वय ३५) छत्रे विद्यालयातील कलाशिक्षक असून, स्वभावाने अत्यंत प्रेमळ असेल तरी शिस्त आणि विद्यार्थिप्रिय शिक्षक म्हणून ओळखले जातात. सध्या दहावी बोर्डाचे पेपर सुरू असल्याने नीलेश जाधव यांना येथील एच. ए. के हायस्कूलमध्ये बोर्डाच्या परीक्षेत सुपरव्हिजनचे काम सोपविण्यात आले होते. पेपर सुरू असताना त्यांनी बोर्डाने घालून दिलेल्या नियमानुसारर काम सुरू ठेवले. नियमांचे उल्लंघन होईल असे काम त्यांनी वर्गात होऊ दिले नाही. याच गोष्टीचा राग आल्याने पेपर संपल्यानंतर ते आपले सर्व काम आटोपून शाळेच्या बाहेर पडले असता विद्यार्थ्यांच्या गर्दीतून त्यांच्या दिशेने काही विद्यार्थ्यांनी दगडफेक केली. यात नीलेश जखमी झाले. त्यांच्या डोक्याला दगड लागल्याने ते रक्तबंबाळ झाले. अशाच अवस्थेत त्यांनी मनमाड पोलिस ठाणे गाठत सर्व घडलेली घटना सांगितली. त्यानंतर त्यांच्यावर रूग्णालयात उपचार करण्यात आले. सदर हल्ला कोणत्या कारणामुळे झाला ते मात्र अद्यापही कळू शकले नाही. सध्या दहावीच्या बोर्डाचे पेपर सुरू असल्याने शाळेच्या गेटजवळ एका शिक्षकावर असा हल्ला होणे म्हणजे हे संशय निर्माण करणारी घटना आहे.
मनमाड महाविद्यालयात हिंदी दिवस उत्साहात साजरा… “हिंदी फक्त राष्ट्रभाषाच नव्हे तर विश्व भाषा” – श्री.राजेंद्र जगताप
मनमाड: येथील महात्मा गांधी विद्यामंदिर संचलित, कला, विज्ञान व वाणिज्य महाविद्यालयाच्या पदव्युत्तर...
