मनमाड : महात्मा गांधी विद्यामंदिर संचलित कला, विज्ञान व वाणिज्य स्वायत्त महाविद्यालयात दिनांक १० सप्टेंबर २०२५ रोजी रोजी विद्यार्थ्यांच्या नाविन्यपूर्ण कल्पना, संशोधन वृत्ती आणि वैज्ञानिक दृष्टिकोनाला चालना मिळावी या उद्देशाने ‘आविष्कार’ संशोधन स्पर्धेचे आयोजन महाविद्यालयाचे प्राचार्य डॉ.अरुण पाटील यांच्या मार्गदर्शनाखाली करण्यात आले. या स्पर्धेसाठी मालेगाव येथील मसगा महाविद्यालयातील भौतिकशास्त्र विभागाचे विभाग प्रमुख डॉ. के एस ठाकरे व शैक्षणिक पर्यवेक्षक डॉ. एम बी सोनवणे हे परीक्षक म्हणून लाभले. या स्पर्धेसाठी ५० विद्यार्थ्यांनी सहभाग नोंदविला. स्पर्धेमध्ये विद्यार्थ्यांनी विविध विषयांवर आधारित नाविन्यपूर्ण असे पोस्टर प्रेसेंटेशन प्रस्तुतीकरण केले. विद्यार्थ्यांनी समाजोपयोगी संशोधन प्रकल्प, प्रात्यक्षिके व सादरीकरणे सादर करून आपली कल्पकता व संशोधनाची दृष्टी व्यक्त केली. परीक्षकांनी विद्यार्थ्यांच्या सादरीकरणांचे बारकाईने परीक्षण करून उत्तम कल्पना व प्रकल्पांना पारितोषिके जाहीर केली.कार्यक्रमाचे अध्यक्षस्थान प्राचार्य डॉ. अरुण पाटील यांनी भूषविले. परीक्षकांनी मार्गदर्शन करताना सांगितले की, विद्यार्थ्यांनी संशोधन क्षेत्रात पुढाकार घ्यावा व समाजहितासाठी उपयुक्त शोध लावावेत असे आवाहन केले. कार्यक्रमास कुलसचिव समाधान केदारे, शैक्षणिक पर्यवेक्षक प्रा डी व्ही सोनवणे, डॉ संजय चिंचोले, प्रा समाधान सुखदेवे, विभाग प्रमुख, प्राध्यापक, विद्यार्थी मोठ्या संख्येने उपस्थित होते.स्पर्धेच्या यशस्वी आयोजनासाठी शैक्षणिक संशोधन समन्वयक डॉ.राहुल काळे, डॉ. पवन सिंग परदेशी यांनी परिश्रम घेतले.
