गेल्या काही दिवसांपासून सण आणि उत्सवांच्या काळात होणाऱ्या ध्वनीप्रदूषणाचा मुद्दा चर्चेत आहे. पुण्यातील विद्यानंद बापट यांनी ध्वनीप्रदूषणाचा मुद्दा मांडला होता. आता मुंबई हायकोर्टाकडून सण-उत्सवातील ध्वनीप्रदूषणाच्या मुद्याची सुमोटो दखल घेण्यात आली आहे. न्यायमूर्ती जीएस कुलकर्णी आणि न्यायमूर्ती नीला गोखले यांच्या खंडपीठानं डीजेमुळं होणाऱ्या ध्वनीप्रदूषणाची दखल घेतली आहे.
मुंबई हायकोर्टाकडून ध्वनी प्रदूषणाचे नियम आणि अंमलबजावणीचा अहवाल उद्या सादर करण्याचे सरकारला आदेश देण्यात आले आहेत. हायकोर्टानं “आमचा कोणत्याही धर्माच्या सणाला विरोध नाही; मात्र इतरांना त्रास होऊ नये,” असं निरीक्षण नोंदवलं आहे. नियम मोडणाऱ्यांची साऊंड सिस्टीम जप्त करून गुन्हे दाखल करण्याचे आदेश देखील पोलिसांना देण्यात आले आहेत. हायकोर्टानं हे आदेश वर्षभरातील सर्व धर्मांच्या मिरवणुकांना लागू राहणार असल्याचं सांगितलं आहे. नागपूर खंडपीठाकडून 1 नोव्हेंबरपर्यंत क्षमतेपेक्षा जास्त आवाज करणाऱ्या डीजेंवर बंदी घालण्यात आली आहे.
