शिवसेनाप्रमुख स्व.बाळासाहेब ठाकरे माजी सैनिक सन्मान योजना अंतर्गत माजी सैनिक व सैनिक विधवा पत्नी यांना मालमत्ता करातून सूट देण्यात यावी, या मागणीचे निवेदन मनमाड नगर पालिकेचे नगरसेवक विनय आहेर यांनी मनमाड नगर परिषदेचे प्रशासकीय अधिकारी अशोक पाईक यांना दिले .
महाराष्ट्र शासनाने माजी सैनिकांना तसेच सैनिक विधवा / पत्नी यांना मालमत्ता करातून सुट देणे बाबत शिवसेनाप्रमुख स्व.बाळासाहेब ठाकरे यांचे नावाने माजी सैनिक सन्मान योजना जाहीर केली आहे. आज पावेतो मनमाड नगर परिषदेमध्ये मनमाड शहरातील रहीवासास असलेल्या व मालमत्ता धारक माजी सैनिकांनी मालमत्ता करातुन सुट मिळणे कामी उपरोक्त शासन निर्णयानुसार मागणी अर्ज सादर केले आहे तसेच सदरील योजना लागू करणे बाबत आदेशीत करुन अहवाल मागविण्यात आलेला असतांनाही अद्याप पावेतो मनमाड नगर परिषदेकडुन सदरील शासन निर्णयाची अंमलबजावणी करण्यात आलेली नसल्याने माजी सैनिकांना सदरील योजनेचा लाभ मिळत नाही. सदरील योजना त्वरीत लागु करुन माजी सैनिक व सैनिक विधवा / पत्नी यांना मालमत्ता करातुन सुट देण्यात यावे, असे दिलेल्या निवेदनात म्हटले आहे.
याप्रसंगी विनय आहेर, माधवराव बच्छाव, निवृत्ती शेळके आदी उपस्थित होते.
